Framboðsnefnd BHM auglýsir eftir félagsmönnum aðildarfélaga sem hafa áhuga á að sitja í stjórnum og nefndum bandalagsins (sjá nánar upptalningu hér að neðan). Áhugasömum er bent á að hafa samband við sitt félag fyrir 15. febrúar nk. Félögin munu svo sjá um að koma upplýsingum um frambjóðendur til framboðsnefndar BHM.

Kosið verður í fjölmargar ábyrgðarstöður innan bandalagsins á aðalfundi þess sem haldinn verður 27. maí nk. Varaformaður BHM verður kjörinn í rafrænni kosningu af aðalfundarfulltrúum eigi síðar en fjórum vikum fyrir aðalfund, samkvæmt ákvæði í lögum bandalagsins sem samþykkt var á framahaldsaðalfundi sl. sumar.

Á aðalfundinum verður kjörið í eftirtaldar stöður:

Stjórn BHM: Þrír aðalmenn í stjórn BHM til tveggja ára.
Varamaður stjórn BHM: Tveir varamenn í stjórn BHM til eins árs.
Skoðunarmenn reikninga: Tveir skoðunarmenn reikninga og einn til vara til eins árs.
Framboðsnefnd: Fimm nefndarmenn og tveir til vara.
Kjörstjórn: Tveir nefndarmenn og einn til vara.
Kjara- og réttindanefnd: Tveir nefndarmenn og einn til vara.
Þjónustu- og aðbúnaðarnefnd: Tveir nefndarmenn og einn til vara.
Jafnréttisnefnd: Tveir nefndarmenn og tveir til vara.
Lagabreytinganefnd: Fimm nefndarmenn.
Stjórn Orlofssjóðs: Tveir nefndarmenn til tveggja ára.
Stjórn Sjúkrasjóðs: Tveir nefndarmenn til tveggja ára.
Stjórn Starfsmenntunarsjóðs: Einn nefndarmaður til tveggja ára.

BSRB, BHM og Fíh boða til baráttufundar fyrir félagsmenn sína þar sem þess verður krafist að viðsemjendur gangi þegar í stað til kjarasamninga.

Opinberir starfsmenn hafa fengið sig fullsadda af skeytingarleysi viðsemjenda nú

þegar tíu mánuðir eru liðnir frá því kjarasamningar losnuðu. BSRB, Bandalag háskólamanna og Félag íslenskra hjúkrunarfræðinga boða til baráttufundar fyrir félagsmenn sína þar sem þess verður krafist að opinberir launagreiðendur gangi þegar í stað til kjarasamninga við starfsfólk sitt.

Fundurinn verður haldinn fimmtudaginn 30. janúar milli klukkan 17 og 18 í aðalsal Háskólabíós. Streymt verður frá fundinum beint á fundi aðildarfélaga BSRB og BHM í Hofi á Akureyri og víðar um land.

Kjarasamningar þorra opinberra starfsmanna hafa verið lausir frá 1. apríl 2019 og hafa viðræður við ríki og sveitarfélög gengið afar hægt. Þolinmæði félagsmanna og samninganefnda er löngu þrotin og kominn tími á að efla samstöðuna og undirbúa aðgerðir.

Á baráttufundinum í Háskólabíói munu eftirtalin flytja stutt ávörp:

• Sonja Ýr Þorbergsdóttir, formaður BSRB.
• Laufey Elísabet Gissurardóttir, formaður Þroskaþjálfafélags Íslands, fyrir hönd BHM.
• Guðbjörg Pálsdóttir, formaður Félags íslenskra hjúkrunarfræðinga.
• Sandra B. Franks, formaður Sjúkraliðafélags Íslands.
• Árni Stefán Jónsson, formaður Sameykis.

Milli ávarpa munu Jónas Sig og ritvélar framtíðarinnar og Reykjavíkurdætur taka nokkur lög.

Nánari upplýsingar má finna á facebook-viðburði fundarins.

BHM-félög skora á ríkið að leita lausna sem báðir aðilar geti unað við

 

Fulltrúar ellefu aðildarfélaga BHM færðu samninganefnd ríkisins heimabakaða köku á samningafundi aðila í morgun. Með þessu vildu félögin, sem eru í samfloti í yfirstandandi kjaraviðræðum við ríkið, hvetja viðsemjandann til dáða en viðræðurnar hafa nú staðið yfir í tæpa 10 mánuði og lítið þokast í samningsátt. Fundurinn í morgun var sá 42. í röðinni.

 

Leitað verði lausna
Félögin ellefu telja að þær launahækkanir sem ríkið hefur boðið séu ófullnægjandi. Þá geta félögin ekki sætt sig við að félagsmenn greiði fyrir styttingu vinnuvikunnar með lækkun á yfirvinnutaxta og sölu kaffi- og matarhléa, líkt og ríkið hefur boðið. Að mati félaganna er þetta ekki til þess fallið að draga úr vinnutengdri streitu og álagi. Þvert á móti er hætta á að tíðni veikinda hjá starfsfólki aukist með tilheyrandi kostnaði fyrir ríkisstofnanir og samfélagið allt.

 

Félögin ellefu eru: Dýra­lækna­fé­lag Íslands, Fé­lag geisla­fræðinga, Fé­lag ís­lenskra nátt­úru­fræðinga, Fé­lag ís­lenskra hljómlist­ar­manna, Fé­lag líf­einda­fræðinga, Fé­lags­ráðgjafa­fé­lag Íslands, Iðjuþjálf­a­fé­lag Íslands, Kjara­fé­lag viðskipta­fræðinga og hag­fræðinga, Ljós­mæðrafé­lag Íslands, Sál­fræðinga­fé­lag Íslands og Þroskaþjálf­a­fé­lag Íslands.

Handleiðslufélag Íslands – Handís fagnar 20 ára afmæli á árinu og hefur af því tilefni sett saman afmælisdagskrá en afmælinu verður fagnað með ýmsu móti. Handleiðslufélag Íslands er þverfaglegt félag sem hefur m.a. það markmið að stuðla að þróun og hagnýtingu handleiðslu ásamt því að kynna kosti og gildi hennar í faglegu starfi.

Við byrjum árið með morgunverðarfundi þann 30. janúar þar sem Alma D. Möller, landlæknir, mun koma og fjalla um heilsu og líðan í starfi en starfstengd streita og kulnun ógnar heilsu okkar og lífsgæðum. Einnig verður erindi um siðfræðilega sýn og afmælisdagskráin fyrir árið kynnt.

Morgunverðarfundurinn sem og afmælisdagskráin í heild sinni á erindi til allra þeirra sem vilja efla sig í starfi, fræðast um handleiðslu og hvernig hún nýtist best sem forvörn gegn streitu og kulnun í starfi.

Handleiðslufélag Íslands vonast til að sjá sem flesta á afmælisárinu og að fagfélögin sjái til þess að koma upplýsingum til sinna félagsmanna og auglýsi viðburði ársins.

Hér er einnig hlekkur á viðburðinn á Facebook:
https://www.facebook.com/events/466953843924059/

Til að einfalda alla umsýslu jafngildir millifærsla skráningu. Verð
er 3.500 kr. og er morgunmatur innifalinn. Bankaupplýsingar: 334 26
051543, kt: 520700-3310. Senda skal kvittun til gjaldkera á
netfangið:[email protected]

Ef einhver hefur ekki aðgang að heimabanka má setja sig í samband við gjaldkera varðandi skráningu og óska eftir að greiða við inngang á fundardegi.